GIÖXE MARZARI GIARDIN ZUULÒGGICU LYRICS

Sûccede ûn caxu lòggicu
u pá ûn giardun zuulòggicu
a famiggia ti m'angusci
e vøan fa i tipi musci

sulu á vedde a muæ
me ne scappa a cuæ
e questa a l'é veitæ.

Quandu a va, au máiu a s'arremba,
ûn po' ranga, sbrincia e zemba,
a l'é ûn annimale raru
intu muru a pá 'n giaguaru,
cose gh'han missu pe fala nasce
oa mi vou diggu á quattru ganasce:

mezu çervellu de ûnna furmígua,
ûn giacché vegiu cun quarche grígua,
15 scarolle, 3 ravanetti,
patatte frite cun peviunetti,
16 sciarbelle, tûtte e lenguette,
cassoule vege, taggiou e mullette,
pocu figætu cun tanta çioula
e quellu gattu ch'ha in caza a Poula,
'nna bella cunca, furnellu pei trøggi
pûgni inta faccia, 3 diæ inti øggi,

e remescia che remescia
adaxu adaxu e sensa sprescia
t'é sciurtiu questu mudellu
ch'u nu pueiva ese ciû bellu.

Miæ ûn po' u máiu vou li ch'u tremma,
u pá 'nna persunn-a scemma,
tûttu cûrvu e mezu infermu,
pá ch'u vadde s'u l'é fermu,
cose gh'han missu pe falu le
oa mi vou diggu chí insce duí pé:

ûn barilettu de cancarun
e tûtta a sciensa de'n bellinun,
3 scambelletti cun tòua e gotti,
stracchin de Bèrgamu, sûccou á motti,
2 færi morti cun 4 cricche,
2 pippe vege, un mûggiu de cicche,
testa d'ûn toru, gambe d'a crava,
dotræ lûmasse cun tanta bava,
tunnu, baccilli cun stucchefisce,
de l'ippupòttamu, poi, se capisce,

e remescia che remescia
adaxu adaxu e sensa sprescia
sensa tanta cunfûxun
l'é sciurtiu quest'imbrægun.

'Nna gallinn-a ranteguza
cu'ûna léngua velenuza,
a l'é a søxua e, stæ segûi,
s'a vuei vedde gh'ø 2 scûi,
de cose l'han fæta, eccu, ve spiegu,
mi me l'ha ditu vantei u megu:

malva e sambûgu pou má de denti,
14 pûrghe, 1000 aççidenti,
cø da canníbbali, unge da gatta,
furmaggiu sardu, rizu cua natta,
enceffalite cun scarlattinn-a,
púvie de zurfu, ûn po' de benzinn-a,
ûn cinucéffalu, 2 ranguten,
15 marmotte, 3 pescichen,
ûn lûmme asmortu, 30 murriagi,
2 trumbe a ventu pe faghe tiá i bagi,

e remescia che remescia
adaxu adaxu e sensa sprescia
eccu l'ûrtimu annimale
da famiggia origginale.